НОВИ ЖАРИШТА НА СИПАНИЦИ КАЈ ОВЦИ И КОЗИ: Над 2.700 животни заболени, од АХВ велат дека нема опасност за луѓето

Од почетокот на јули во Македонија се потврдени десет нови жаришта на сипаници кај овци и кози. Според Агенцијата за храна и ветеринарство, во земјава во моментов има вкупно 17 потврдени жаришта, во кои се заболени повеќе од 2.700 животни, но болеста не претставува опасност за луѓето.

Жаришта во повеќе општини

Новите случаи се потврдени во одгледувалишта во Саса во Македонска Каменица, Соколарци во Чешиново-Облешево, Бигла во Делчево, Малино и Косевица во Свети Николе и Сопот во Куманово. Болеста е регистрирана во 15 одгледувалишта на овци и во две одгледувалишта во кои се чуваат овци и кози.

АХВ досега спровела депопулација на повеќе од 1.400 животни, а постапката треба да продолжи и во новопотврдените жаришта по обезбедувањето соодветни локации. Во погодените одгледувалишта се спроведуваат попис, отстранување на животните, чистење, дезинфекција и епидемиолошки испитувања.

Забрането движење и промет во заштитните зони

Во заштитните зони е забрането движењето и превозот на овци и кози, освен под строго утврдени услови за колење во одобрени објекти. Забранета е и работата на добиточните пазари за овци и кози на целата територија на државата, како и организирањето изложби и слични настани.

Од сточарите се бара секој сомнеж за болеста или угинување на животно да го пријават во рок од 24 часа. АХВ препорачува ограничено движење на луѓе и возила во одгледувалиштата, користење заштитна облека и обувки, дезинфекција и изолација на секое нововнесено животно.