ОД ЗЕЛЕНИКОВО ДО СКОПЈЕ ЗА 24 МИНУТИ: Градскиот воз од задутре повторно на шините

Од 1 септември повторно се воспоставува железничката врска меѓу Зелениково и Скопје, со градски воз кој ќе сообраќа осум пати дневно во двата правца. Возот ќе застанува во Зелениково, Зелениково Ново, Орешани, Јане Сандански, Драчево и Лисиче, а крајна станица ќе биде Железничката станица Скопје.

Осум поаѓања дневно во двата правца

Од Скопје првиот воз ќе тргнува во 5:32 часот, а следните поаѓања се во 7:30, 11:40, 13:20, 15:42, 17:45, 19:12 и 20:56 часот. Од Зелениково првиот воз ќе поаѓа во 6:20 часот, по што следуваат термините во 8:30, 12:26, 14:00, 16:25, 18:30, 20:12 и 21:55 часот.

До Скопје за најмногу 28 минути

Патувањето ќе трае меѓу 24 и 28 минути, зависно од правецот и терминот на поаѓање. Новиот возен ред ќе важи до 31 декември 2026 година, а железничката врска треба значително да им го олесни секојдневното патување на жителите на Зелениково, Орешани, Драчево, Лисиче и околните населени места кон Скопје.