ПОЧИНА ВЕДРАНА РУДАН: познатата писателка ја загуби битката со ракот на жолчните канали

Ја одбележа храброста да зборува отворено

Хрватската писателка, новинарка и колумнистка Ведрана Рудан почина на 76-годишна возраст по тешка битка со ракот. Веста за нејзината смрт беше објавена денеска, а на нејзината официјална веб-страница стоеше кратката порака: „Ведрана отиде во област без сигнал“. Рудан во 2024 година откри дека боледува од редок и исклучително агресивен рак на жолчните канали, за кој јавно и без задршка зборуваше. Таа беше позната по својот остар, провокативен и често контроверзен стил, со кој со години ги коментираше политиката, општеството, медиумите, бракот и положбата на жените. Нејзините ставови често предизвикуваа силни реакции, но токму директноста и бескомпромисноста ја направија една од најпрепознатливите јавни личности во регионот.

„Сакам да кажам дека има многу луѓе кои ме сакаат“

Во последното интервју за емисијата „Неделјом у 2“, Рудан зборуваше за својата болест и за начинот на кој ја гледа сопствената смрт. Таа тогаш порача дека сака нејзиното заминување да биде сфатено како „одење во област без сигнал“, реченица која денес доби особено силно значење. Рудан е родена на 29 октомври 1949 година во Опатија, а зад себе остави бројни романи и збирки колумни, преведени и надвор од Хрватска. Со својата работа остави силен печат во хрватската книжевност, новинарството и јавниот простор.