ПОЧНА ПОРИБУВАЊЕТО НА ОХРИДСКОТО ЕЗЕРО: ќе бидат пуштени вкупно 1,6 милиони единки охридска пастрмка

Во првата фаза ќе се пуштат 100 илјади пастрмки

Денеска започна порибувањето на Охридското Езеро со охридска пастрмка, а во првата фаза ќе бидат пуштени 100 илјади единки произведени од вештачкиот мрест во 2025 година. Во активностите учествуваше заменик-министерот за земјоделство, шумарство и водостопанство Албрим Хоџа, заедно со претставници на Државниот инспекторат за земјоделство и ЈНУ „Хидробиолошки завод Охрид“. Подмладокот има просечна тежина од околу 16 грама, а порибувањето ќе продолжи во следните пет до шест дена. Пастрмката ќе биде пуштана на локалитетите Трпејца, Пештани, Радожда, Калишта, Охрид и Струга, од каде што во 2025 година биле земени матици од природната популација за обезбедување репродуктивен материјал.

Во септември следува втората и поголема фаза

Процесот се одвива под надзор на надлежните институции, со присуство на инспектори од Државниот инспекторат за земјоделство и Агенцијата за храна и ветеринарство. Порибувањето ќе продолжи и во септември, кога во езерото треба да бидат пуштени околу 1,5 милиони единки охридска пастрмка од вештачкиот мрест во 2026 година, а оваа фаза ќе трае околу три недели. Така, во двете фази Охридското Езеро ќе биде порибено со вкупно околу 1,6 милиони единки, со цел обновување и зачувување на популацијата на охридската пастрмка и заштита на биолошката разновидност на езерото.