СИЉАНОВСКА-ДАВКОВА СЕ СРЕТНА СО ДИЈАСПОРАТА ВО БЕЛГИЈА: Порача дека врските со татковината мора да се негуваат

Претседателката Гордана Сиљановска-Давкова, во рамките на работната посета на Брисел, оствари средба со претставници на македонската дијаспора во Белгија. Присутните ги споделиле своите искуства од животот и работата во Белгија, посочувајќи ја потребата од постојана комуникација и посилна поврзаност со македонските институции. Претседателката нагласила дека географската дистанца не значи и духовно оддалечување од татковината.

Дијаспората како партнер во развојот на државата

Сиљановска-Давкова посочила дека врските со дијаспората треба да се негуваат, шират и продлабочуваат, без оглед на етничкото потекло, јазикот или генерацијата на која ѝ припаѓаат иселениците. Таа ја истакнала и подготвеноста на присутните преку различни проекти да ги споделат стекнатите знаења и искуства со македонските граѓани. Нивната експертиза и професионални контакти, според неа, можат да придонесат за унапредување на трговската размена и поефикасно користење на европските фондови.

Повик за поголемо институционално поврзување

Претседателката нагласила дека дијаспората не треба да биде само набљудувач на општествените процеси, туку активен и рамноправен партнер во нивното обликување. Тоа, според неа, треба да се постигне преку институционално поврзување, размена на знаења и искуства и непосредно учество во креирањето политики.