СО 1,81 ПРОМИЛИ ЗАД ВОЛАН НА АВТОПАТ: Превезувал и вонгабаритна дигалка без дозвола

Полицијата приведе 62-годишен професионален возач од Прилеп, кој управувал товарно возило под дејство на алкохол на автопатот Велес – Скопје.

Возачот бил запрен денеска, 20 јули, во 8:40 часот од полициски службеници на Мобилната единица за безбедност на сообраќајот на патиштата.

Алкотестот покажал 1,81 промили

При извршеното алкотестирање било утврдено присуство на 1,81 промили алкохол во крвта на возачот.

Тој управувал товарно возило „волво“ со прилепски регистарски ознаки, со кое превезувал работна машина.

Станувало збор за дигалка широка 275 сантиметри, која се превезувала како вонгабаритен товар.

Според МВР, возачот немал одобрение за вршење вонреден превоз.

Ќе одговара за безобѕирно управување

Против К.З. од Прилеп се преземени соодветни мерки и тој ќе се соочи со законски предвидените санкции.

Од МВР информираат дека ќе одговара за безобѕирно управување со моторно возило, како и за вршење вонгабаритен превоз без потребното одобрение.

Барање за поведување прекршочна постапка ќе биде поднесено и против правното лице и одговорното лице во компанијата.

Полицијата најави дека засилените сообраќајни контроли ќе продолжат низ целата држава со цел зголемување на безбедноста на патиштата.