АЗЕСКИ СО ПОФАЛБИ ЗА МУЦУНСКИ: Го остварува ветеното пред бизнис-заедницата

Претседателот на Стопанската комора на Македонија, Бранко Азески, оцени дека министерот за надворешни работи и надворешна трговија, Тимчо Муцунски, го реализира ветеното пред бизнис-заедницата.

Азески посочи дека низ годините укажувал и на позитивните страни и на кадровските и финансиските слабости на македонската дипломатија.

Позитивен пресврт во мисијата во Брисел

Според Азески, за време на неговата последна посета на Брисел бил забележлив позитивен пресврт во професионалноста на дипломатскиот тим и во опременоста на македонската мисија.

Тој смета дека започнува реализацијата на владината политика за трансформација на Министерството за надворешни работи во институција што поактивно ќе ја поддржува и надворешната трговија.

Како носители на овој процес, Азески ги пофали дипломатите Пеце Бошески, Мбареса Истрефи-Исмаили, Ерсин Баки и амбасадорот Зулфи Исмаили.

Претседателот на Комората нагласи дека работата на тимот во Брисел наишла на професионална поддршка од Европската комисија и од Европскиот економско-социјален комитет.

Брисел да биде основа за суштински промени

Азески порача дека македонското претставништво во Брисел треба да биде темелот од кој ќе започнат суштинските промени на патот кон Европската Унија.

Според него, мисијата мора да биде добро опремена, финансиски поддржана и подготвена за претстојните предизвици.

Тој оцени дека лидерството треба да биде поврзано со јасна цел, темелни вредности и одговорно користење на парите на граѓаните.