ТЕХЕРАН ГИ ОТФРЛИ ТВРДЕЊАТА НА ТРАМП: Не се планираат разговори со Вашингтон

Иран соопшти дека во моментов не води преговори со Соединетите Американски Држави и дека не се договорени средби меѓу претставници на двете земји. Со тоа Техеран директно ги демантираше тврдењата на американскиот претседател Доналд Трамп дека дипломатските разговори треба да започнат наскоро. Трамп претходно изјави дека се откажал од планираните воени напади затоа што повеќе би сакал спорот да биде решен со договор.

Техеран не очекува странски делегации

Портпаролот на иранското Министерство за надворешни работи, Есмаил Багаеи, изјави дека нема активни преговори со Вашингтон, ниту закажани средби. Тој нагласи дека Иран во наредните денови не очекува странски делегации и не планира да испраќа свои претставници на разговори во странство. Единствените потврдени разговори се водат со Оман и се однесуваат на пловидбата и управувањето со Ормускиот Теснец.

Спорот околу Ормускиот Теснец продолжува

Висок ирански извор, исто така, потврдил дека не се планирани директни разговори со американската страна. Спорот околу Ормускиот Теснец останува една од главните точки на несогласување, бидејќи Вашингтон бара непречен поморски сообраќај, додека Техеран инсистира на своите надлежности во стратешкиот премин. По најавата на Трамп дека нема веднаш да преземе воена акција, светските цени на нафтата забележаа значителен пад.