ФЗО ГИ ЗАСИЛУВА КОНТРОЛИТЕ ВО ПРИВАТНИТЕ БОЛНИЦИ: Ќе проверува дали пациентите незаконски плаќаат за покриени услуги

Фондот за здравствено осигурување (ФЗО) ги засилува контролите во здравствените установи со кои има склучено договор, по откриениот случај со двојна наплата на операции на очи од страна на приватна болница. Контролите ќе бидат насочени особено кон наплатата на здравствените услуги и откривањето неправилности при наплата на услуги покриени со задолжителното здравствено осигурување. Од Фондот најавуваат дека ќе проверуваат дали постои усогласеност меѓу извршените и фактурираните услуги, колку средства се наплатени од пациентите и дали се почитуваат правилата за партиципација.

Пациентите не треба да плаќаат дополнително за покриени услуги

Од ФЗО потсетуваат дека осигурениците не треба да плаќаат дополнителни суми за услуги покриени со задолжителното здравствено осигурување, освен законски предвидената партиципација. Здравствените установи се должни на видно место да ја истакнат висината на партиципацијата и за секоја наплата да издадат соодветен доказ. Доколку контролите утврдат неправилности, Фондот најавува преземање мерки согласно договорите со установите и важечките законски прописи.

ФЗО ги повикува граѓаните да пријавуваат неправилности

Осигурениците кои имаат информации за неоснована наплата на здравствени услуги можат да се обратат до Секторот за контрола на Фондот. Од институцијата посочуваат дека пријавите ќе бидат разгледани со почитување на приватноста и заштитата на личните податоци. Засилените контроли следуваат по случајот во кој, според истражните органи, приватна болница наплаќала од Фондот и од пациентите за исти операции, со што биле оштетени меѓу 3.000 и 4.000 пациенти, а буџетот на ФЗО за околу 1,7 милиони евра.