Македонија
Дознај прв
УНЕСКО МУ ДАДЕ НОВ РОК НА ОХРИД: Владата има уште пет години за да го заштити светското наследство
Охридскиот Регион нема да биде ставен на Листата на светско наследство во опасност, откако УНЕСКО ѝ даде на Владата уште пет години за исполнување на обврските.
Комитетот за светско наследство на УНЕСКО одлучи Охридскиот Регион засега да не биде впишан на Листата на светско наследство во опасност. Наместо тоа, македонската Влада доби дополнителен рок од пет години за да ги спроведе препораките и да преземе конкретни мерки за заштита на природното и културното наследство.
Одлуката ја поддржале 16 земји
Одлуката била донесена на 48. сесија на Комитетот за светско наследство, која се одржува во Бусан, Јужна Кореја. За предлогот гласале 16 од вкупно 21 земја членка на Комитетот. Одложувањето следува по писмото со обврски и приоритети што го потпишале Владата и надлежните општини.
УНЕСКО предупреди на сериозни закани
Во првичната нацрт-одлука било предложено природното и културното наследство на Охридскиот Регион, кое го делат Македонија и Албанија, да биде прогласено за светско наследство во опасност. Како причина биле наведени недоволниот напредок, сериозните закани и фактот дека главните ризици сè уште не се отстранети. Владата во следните пет години ќе треба да ги решава проблемите со дивоградбите, урбанизацијата и заштитата на охридското крајбрежје. Новиот рок претставува уште една можност за институциите да преземат вистински чекори за зачувување на уникатното наследство на Охрид.
