(ВИДЕО) ОД ДИВА ДЕПОНИЈА ДО НОВ МЕГА-ПАРК: Карпош добива зелено јадро на 72.000 квадратни метри

Град Скопје започнува со реализација на проект за изградба на нов мега-парк во општина Карпош, на површина од 72.000 квадратни метри. Просторот кој со години бил запуштен и претворен во дива депонија, треба целосно да се уреди и да се стави во функција на граѓаните. Проектот предвидува хортикултурно уредување, детски игралишта, парк за миленици, спортски содржини, велосипедски полигон, пешачки патеки и поставување урбана опрема. Со тоа, овој дел од Карпош треба да прерасне во ново зелено јадро за рекреација, спорт, прошетки и дружење.

Запуштен простор ќе стане место за одмор

Новиот парк треба да донесе повеќе зелени површини и подобри услови за живот во овој дел од Скопје. Од Градот посочуваат дека целта е долгогодишно запоставената локација да се претвори во современ јавен простор за сите генерации.

Содржини за сите возрасти

Покрај зеленилото, проектот предвидува и рекреативни и забавни содржини за посетители од различна возраст. Со изградбата на мега-паркот, некогашната дива депонија треба да стане едно од позначајните места за одмор во Карпош и нов симбол на урбаното уредување во главниот град.