ДЕЈАН ШОШКИЌ СЕ СПОМЕНУВА КАКО МОЖЕН ПРЕМИЕР НА СРБИЈА: Кој е поранешниот гувернер на Народната банка?

По изборната победа на студентската листа во Србија, во јавноста сè почесто се поставува прашањето кој ќе ја предводи новата влада. Меѓу имињата што се споменуваат како можни кандидати за премиер е и Дејан Шошкиќ, поранешен гувернер на Народната банка на Србија и универзитетски професор по економија, пренесува Кликс.

Иако дел од медиумите го оценуваат како еден од најсериозните кандидати за премиерската функција, студентската листа досега официјално не потврдила дека токму нему ќе му ја довери задачата за формирање на новата влада.

Кој е Дејан Шошкиќ?

Шошкиќ е роден во 1967 година во Белград. Дипломирал на Економскиот факултет при Универзитетот во Белград во 1989 година, каде што бил прогласен за студент на генерацијата. Магистрирал во 1993 година, а докторирал во областа на финансиите во 1999 година.

Од 1993 година работи на истиот факултет, каде што денес е редовен професор. Бил и стипендист на програмата „Фулбрајт“, а предавал и во Соединетите Американски Држави.

Пред да биде именуван за гувернер, работел како советник за финансиски пазари во Народната банка на Југославија, а потоа бил член и претседател на Советот на Народната банка на Србија. На чело на централната банка застанал на 28 јули 2010 година.

Поднесе оставка поради независноста на централната банка

Шошкиќ поднесе оставка од функцијата гувернер во август 2012 година, откако беа покренати законски измени за кои сметал дека ја нарушуваат независноста на централната банка.

Во јавните настапи тој претходно изјавувал дека нема политички амбиции и дека, доколку сакал да се занимава со политика, веќе би бил член на некоја партија.

За време на предизборната кампања, претседателот на Србија, Александар Вучиќ, го посочуваше Шошкиќ како можен кандидат на студентската листа за премиер. Шошкиќ, пак, во интервју за Serbia Elects изјавил дека е кандидат за пратеник и дека за составот на владата ќе се разговара по изборите.

Најави лустрација и проверка на потеклото на имотот

Во интервју за неделникот „Време“, Шошкиќ говорел за можните чекори на новата власт, меѓу кои ги навел смената на несоодветните кадри, донесувањето закон за лустрација и проверката на потеклото на имотот.

Тој оценил и дека Србија може да помине низ промена на власта без сериозни економски потреси. Во јавните настапи предупредувал на растот на јавниот долг, наведувајќи дека тој се удвоил од 2012 година.

Шошкиќ се залага и за забрзување на реформите поврзани со членството на Србија во Европската Унија, со став дека конечната одлука за пристапувањето треба да ја донесат граѓаните на референдум.

Сепак, неговото евентуално именување за премиер останува неизвесно. Студентската листа сè уште нема официјално објавено кого ќе предложи за мандатар, а конечната одлука за изборот на претседател на владата ја носи Народното собрание на Србија. Освен Шошкиќ, се споменува и Илија Срдановиќ.

КОЈ Е ИЛИЈА СРДАНОВИЌ: Кардиологот се најде на чело на студентското движење, можен иден премиер на Србија