АЛТА БАНКА БИТОЛА МОЖЕ ДА ДОБИЕ НОВ СОПСТВЕНИК: Се разгледува преземање од домашна банкарска институција

Се разгледува можноста АЛТА банка АД Битола да премине во сопственост на домашна банкарска институција, откако нејзината матична банка во Србија остана без дозвола за работа. Според информации објавени од „Фактор“, меѓу можните решенија за долгорочно обезбедување на стабилноста на банката е и нејзино преземање од страна на финансиски силна домашна банкарска институција.

Се разгледуваат можни решенија за иднината на банката

Според извори запознаени со состојбите во финансискиот сектор, се анализираат различни сценарија за обезбедување на стабилноста на АЛТА банка Битола.

Едно од нив е преземање од страна на домашна банка, што, доколку се реализира со почитување на законските процедури и регулаторните услови, би можело да обезбеди континуитет во работењето и дополнителна заштита на интересите на клиентите и депонентите.

Засега нема официјална потврда дека е постигнат конкретен договор или дека е започната постапка за преземање на банката. „Фактор“ испратил прашање до раководството на Народната банка и очекува одговор.

Матичната банка во Србија остана без дозвола

Случајот доаѓа по одлуката на Народната банка на Србија да ѝ ја одземе дозволата за работа на АЛТА банка АД Белград. Српскиот регулатор најави дека со судска одлука Агенцијата за осигурување на депозити ќе биде назначена за стечаен управник.

АЛТА банка АД Битола, по одлуката во Србија, соопшти дека е самостојно правно лице, регистрирано во Северна Македонија, кое работи согласно домашната законска регулатива и е под непосреден супервизорски надзор на Народната банка.

Банката уверува дека работењето е непречено

Од битолската банка информираа дека се ликвидни и дека продолжуваат со редовно работење. Експозитурите и банкоматите функционираат во вообичаениот режим, а клиентите имаат непречен пристап до своите средства.

„Клиентите можат слободно да располагаат со своите депозити, да подигнуваат готовина и да ги извршуваат сите банкарски трансакции, согласно вообичаените услови на работење“, соопштија од банката.

И Народната банка на Македонија информираше дека банкарскиот систем во земјава е стабилен и отпорен, нагласувајќи дека одземањето на дозволата на банката во Србија не значи автоматско одземање на дозволата за работа на АЛТА банка АД Битола.