НОВ УДАР ЗА ВОЗАЧИТЕ: Дизелот поскапе за 2,5 денари, повисоки цени и на бензините

Од денеска, 14 јули, граѓаните точат гориво по повисоки цени, откако Регулаторната комисија за енергетика донесе нова одлука за поскапување на нафтените деривати. Малопродажните цени во просек се зголемуваат за 1,47 проценти.

Дизелот се продава по 82,50 денари

Најголемо зголемување има кај дизел-горивото, кое поскапува за 2,50 денари и сега се продава по цена од 82,50 денари за литар. ЕУРОСУПЕР БС-95 поскапува за еден денар и новата цена изнесува 85,50 денари за литар. ЕУРОСУПЕР БС-98, исто така, е поскап за еден денар и се продава по цена од 87,50 денари за литар.

Поскапо и маслото за домаќинство

Екстра лесното масло за домаќинство поскапува за два денари, па неговата нова цена изнесува 81,50 денари за литар. Единствено поевтинува мазутот М-1 НС, чија цена е намалена за 0,265 денари и изнесува 41,230 денари за килограм. Од РКЕ објаснуваат дека новите цени се должат на растот на референтните цени на горивата на светските пазари, како и на промената на курсот на денарот во однос на американскиот долар.