НА ДЕНЕШЕН ДЕН Е РОДЕН БОРКА ТАЛЕСКИ – ЦРНИОТ: На само 21 година го дал животот за слободна Македонија

На 19 јули 1921 година во Прилеп е роден Борка Талески, познат под партизанските имиња Црниот и Модерното – македонски револуционер, борец и еден од организаторите на народното востание против фашистичкиот окупатор.

Талески загинал на само 21-годишна возраст, на 2 март 1942 година во близина на селото Плетвар, откако заедно со Лазо Филиповски – Лавски бил предаден и опколен од бугарските окупаторски сили.

Одличен ученик, писател и студент по медицина

Основното образование го започнал во родниот Прилеп, а средното го завршил во Битола. Уште како млад покажувал голем интерес за литературата и пишувањето, па на 17-годишна возраст објавувал текстови во списанието „Подмладак“ од Крагуевац.

По завршувањето на средното образование во 1939 година се запишал на Медицинскиот факултет во Белград, каде се приклучил кон револуционерното движење. Бил познат како храбар и одлучен млад човек, вешт говорник и организатор.

Еден од организаторите на востанието

Во 1940 година, за време на Илинденската демонстрација во Прилеп, Борка Талески зборувал пред насобраниот народ за независноста и самобитноста на македонскиот народ и Македонија. Поради својата активност бил уапсен и затворен, но по ослободувањето продолжил со револуционерната работа.

Тој активно учествувал во подготовките за вооружената борба и бил еден од организаторите на востанието што започнало на 11 октомври 1941 година во Прилеп.

На 11 октомври 1951 година, Борка Талески бил прогласен за народен херој на Македонија. Неговото име и денес го носат повеќе училишта, улици и институции, како потсетник на младоста положена за слободата на татковината.