НЕ ОТВОРАЈТЕ ГИ ЛАЖНИТЕ ПОРАКИ ОД „БЕЗБЕДЕН ГРАД“: Измамници бараат уплата за наводен сообраќаен прекршок

Министерството за внатрешни работи предупредува дека во изминатиот период се забележани фишинг-напади преку лажни СМС и електронски пораки, веб-страници, мобилни апликации и социјални мрежи. Пораките наводно се испраќаат од Одделот за моторни возила и се претставуваат како известувања од системот „Безбеден град“. Во нив се тврди дека примачот направил сообраќаен прекршок, по што преку лажен линк се бара да изврши уплата.

Не споделувајте банкарски и лични податоци

Од МВР апелираат граѓаните да не отвораат сомнителни линкови и да не споделуваат броеви од банкарски картички, лозинки или лични идентификатори преку неовластени канали. Се препорачува внимателно да се провери адресата на испраќачот, бидејќи институциите и компаниите користат службени домени. Граѓаните треба да користат двофакторска автентикација и сомнителните пораки да ги пријават во надлежните институции или во својата банка.

Како изгледа официјалното известување од МВР?

Официјалните СМС-известувања за направен сообраќаен прекршок треба да пристигнуваат од испраќачот „MVR-SC“. Во текстот задолжително треба да биде наведена регистарската ознака на возилото, а официјалниот линк треба да започнува со „https://safecountry.mvr.gov.mk“. Секторот за компјутерски криминал продолжува со истраги и презема мерки за откривање и санкционирање на сторителите на ваквите измами.