РУСИ УАПСЕНИ ВО ТИВАТ: Во 19 куфери носеле опрема за надзор и околу милион евра

Полицијата претресла објекти во Будва и Бар

Маж и жена од Русија се уапсени на аеродромот во Тиват, откако во нивниот багаж била пронајдена голема количина електронска опрема и пари. Двајцата биле запрени на 23 септември додека се обидувале да се качат на лет за Тел Авив со дури 19 куфери. При последователни претреси на објекти во Будва и Бар што ги користеле осомничените, биле пронајдени околу еден милион евра и дополнителна ИТ опрема.

Камери, GPS уреди и опрема за откривање прислушкување во Тиват

Во куферите биле пронајдени камери, GPS уред со микрофон и професионален уред за откривање радио предаватели, како и компјутерски компоненти, мемориски уреди и друга електроника. Црногорската полиција претходно соопштила дека кај нив биле пронајдени и 26.210 евра, 1.150 израелски шекели, непријавена електронска опрема и лекови. Двајцата руски државјани се осомничени за шверц и перење пари, а истрагата треба да го утврди потеклото и намената на парите и опремата.