МАКЕДОНСКИ КОМПАНИИ ЌЕ ПРАВАТ ДРОНОВИ ЗА АРМИЈАТА: Мисајловски најави закон за воена индустрија

Македонски компании, меѓу кои и фирми основани од млади луѓе кои веќе произведуваат дронови, би можеле да добијат директна државна поддршка за развој на производи за Армијата и пазарот на НАТО. Министерот за одбрана Владо Мисајловски најави нов закон за воена индустрија, со кој се предвидува формирање посебни зони за компаниите и обезбедување финансиска помош за развој на домашното производство. Мисајловски рече дека целта е македонските компании да добијат можност да произведуваат опрема што ќе ја користи Армијата, а потоа и да ја извезуваат во странство. Според министерот, новото законско решение ќе овозможи субвенции и дополнителни средства за истражување и развој на компаниите од одбранбената индустрија.

Државна поддршка за младите компании што произведуваат дронови

Мисајловски информираше дека веќе имале средба со претставници на домашни компании во кои млади луѓе започнале со производство на дронови. Тој посочи дека на дел од овие компании им е потребна поддршка за да ги развијат производите и да можат да настапат на странските пазари. Предвидено е производите најпрво да се користат и тестираат во домашниот систем, а потоа да добијат соодветни потврди за да можат да се пласираат и на пазарите на земјите членки на НАТО.

Планирани инвестиции од речиси една милијарда евра

Министерот истакна дека во следните десет години се планираат инвестиции од речиси една милијарда евра во модернизацијата на одбраната, при што дел од средствата би можеле да придонесат за развој на домашното производство. Според него, околу 30 компании веќе се регистрирани во областа на наменската индустрија и доставуваат понуди, а Министерството разгледува можности за дополнителни олеснувања. Мисајловски најави дека законското решение ќе биде подготвено во соработка со стратешки партнер и потоа ќе биде доставено до Собранието. Целта е да се создадат услови македонските компании да произведуваат производи за потребите на Армијата и да станат дел од поширокиот одбранбен пазар на НАТО.