ФИЛИП ТАЛЕСКИ СИ ОДИ ОД ОХРИД: По само три месеци ја заврши сезоната

Македонскиот ракометар Филип Талески повеќе не е дел од Охрид, откако соработката со клубот завршила предвреме по само три месеци, дознава „24Ракомет“. Левиот бек летово потпиша договор за сезоната 2026/27, со можност за продолжување на уште една година, но неговиот престој покрај Охридското Езеро заврши уште во октомври. Според информациите, несогласувањата започнале пред околу две недели, по што дошло до раскинување на договорот.

Ограничена минутажа и неочекуван крај на соработката

Талески во тимот на Борис Ројевиќ почесто бил користен во одбраната, додека во нападот добивал помала минутажа од очекуваното. Сомнежите за неговото заминување се зголемиле и на европскиот натпревар против турски Спор Тото, кога бил присутен во салата „Билјанини Извори“, но седел на трибините, без клупски обележја. За македонскиот ракометар ова е втор последователен октомври во кој се разделува со клуб за кој потпишал во текот на летото, откако слично сценарио му се случи и со Вардар минатата година.

Талески повторно ќе бара нова средина

Пред да дојде во Охрид, Талески настапуваше за унгарска Татабања, со која стигна до финалето на ЕХФ Европскиот куп, каде што неговиот тогашен тим загуби токму од Охрид. Во кариерата настапуваше и за Металург, германските Рајн Некар Левен и Балинген, Вардар и португалска Бенфика, а има и искуство со македонската репрезентација. Според објавените информации, во текот на сезоната нема можност веднаш да премине во друг македонски клуб, бидејќи веќе настапувал за Охрид, па таква опција би се отворила во зимскиот преоден рок. Во меѓувреме, останува отворена можноста за ангажман во странство, додека евентуалното продолжување на паузата би значело дека ќе мора да тренира со друга екипа за да ја одржува формата.

Целата вест: 24 ракомет