ГЕРМАНИЈА ГИ МЕНУВА ПРАВИЛАТА ЗА РАБОТНИЦИТЕ ОД БАЛКАНОТ: До 12 часа работа дневно и двојно помалку дозволи

Квотата за работници од Западен Балкан може да се преполови

Германија разгледува промени што би можеле да влијаат врз македонските граѓани кои планираат да работат во земјата. Според најавите, од 1 јануари 2027 година годишната квота во рамките на „Правилото за Западен Балкан“ би се намалила од 50.000 на 25.000 одобренија. Програмата им овозможува на граѓаните од Македонија, Србија, Албанија, Босна и Херцеговина, Црна Гора и Косово да добијат работна виза под олеснети услови. Германската Сојузна агенција за труд се противи на намалувањето, предупредувајќи дека тоа може дополнително да го отежне обезбедувањето работници за економијата.

Работниот ден во Германија би можел да трае до 12 часа

Германската влада разгледува и измени на Законот за работното време, со кои во одредени околности работниот ден би можел да трае до 12 часа, при што работните часови би се пресметувале на неделно ниво. Работодавците ја поддржуваат поголемата флексибилност, додека синдикатите предупредуваат на можните последици врз здравјето и семејниот живот на вработените. Според објавените информации, од 1 ноември 2026 година се најавуваат и построги правила за испитот по германски јазик DTZ, што би можело да влијае врз доселениците на кои им е потребен сертификат за јазикот во постапките за престој или државјанство.