КИСЕЛА ВОДА СО НОВ ЦИКЛУС СРЕДБИ: Граѓаните директно со општинскиот тим за локалните проблеми

Со средбата што се одржа вчера вечер во просториите на урбаната заедница „11 Октомври-Згради“, официјално започна новиот циклус посети на месните и урбаните заедници во Општина Кисела Вода. Градоначалничката Бети Стаменкоска Трајкоска и општинскиот тим разговараа со жителите за досегашната реализација на проектите, но и за идните приоритети. Во отворена атмосфера, граѓаните имаа можност директно да ги посочат своите потреби пред градоначалничката, раководителите и претставниците на општинската администрација. Меѓу реализираните проекти беа издвоени проширувањето на капацитетите на детската градинка „Весели цветови“ – клон „Кокиче“, како и доградбата на нови училници во ООУ „Невена Георгиева Дуња“. Жителите изразија благодарност и за проектот за санација на постоечките лифтови преку доделување субвенции, како и за редовното одржување на трим-патеката и културните настани во парковите „Шопен“ и „Пушкин“. На средбата беа посочени и нови барања, меѓу кои поставување осветлување пред салата „Расадник“, дополнителен паркинг зад зградата на улицата „Михаил Чаков“ бр. 13 и нови контејнери на улиците „Петар Дељан“ и „Михаил Чаков“. Како приоритет беше посочено и асфалтирањето на преостанатата уличка во должина од околу 50 метри зад зградата на Општината. Теренските средби ќе продолжат и во наредниот период, со посети на сите месни и урбани заедници во Општина Кисела Вода.

Граѓаните ги посочија приоритетите

На средбата жителите директно ги презентираа проблемите и потребите поврзани со инфраструктурата, осветлувањето, паркинг-просторот и комуналната опрема.

Средбите продолжуваат низ Кисела Вода

Од Општина Кисела Вода најавија дека вакви средби ќе се одржуваат и во останатите месни и урбани заедници, со цел граѓаните директно да ги презентираат своите барања.