КРАЈ НА ЕРАТА НА ДЕШАН: Зинедин Зидан ќе биде нов селектор на Франција

Зинедин Зидан ќе биде нов селектор на француската фудбалска репрезентација и ќе го наследи Дидие Дешан, објавуваат повеќе европски медиуми. Според информациите, поранешниот тренер на Реал Мадрид постигнал договор со Француската фудбалска федерација и треба да ја преземе функцијата на 1 септември. Сепак, Федерацијата сè уште официјално не го потврдила неговото назначување.

Дешан заминува по 14 години

Дидие Дешан го заврши својот долгогодишен мандат по настапот на Франција на Светското првенство во 2026 година. Неговиот последен натпревар на клупата беше дуелот за третото место против Англија, во кој Французите загубија со 6:4.

Дешан ја предводеше репрезентацијата од 2012 година и во тој период ја однесе до светската титула во 2018 година. Под негово водство Франција играше и во финалето на Европското првенство во 2016 година, финалето на Мундијалот во 2022 година и ја освои Лигата на нации во 2021 година.

Зидан се враќа на тренерската клупа

За Зидан ова ќе биде прв селекторски ангажман и враќање во тренерските води по заминувањето од Реал Мадрид во 2021 година. Како тренер на шпанскиот гигант трипати последователно ја освои Лигата на шампионите и двапати стана шампион на Шпанија.

Според медиумските информации, Зидан треба да потпише долгорочен договор до 2030 година, а неговото официјално претставување се очекува до крајот на јули. Првите натпревари на Франција со новиот селектор се предвидени за крајот на септември во Лигата на нации.