МАКЕДОНИЈА ЈА ПАКУВА ФОРМАТА ЗА ВИЕНА: Кошаркарите со полн фокус кон Австрија

Македонската машка кошаркарска репрезентација ја започна завршната фаза од подготовките за важниот натпревар против Австрија, кој ќе се одигра на 30 август во Виена. Избраниците на селекторот Жозеп Марија Берокал подготовките ги реализираат во Скопје, каде во наредните денови ќе работат на тактичките замисли и физичката подготвеност. За репрезентацијата ова е значаен дуел во втората рунда од претквалификациите за Европското првенство во 2029 година.

Димитријевиќ повторно во националниот дрес

По кратката пауза, во репрезентацијата повторно е Ненад Димитријевиќ, кој се враќа во сениорскиот национален тим со големи амбиции. Македонскиот кошаркар смета дека Австрија е сериозен противник кој игра брза кошарка, но верува дека тимот има доволно време за квалитетна подготовка. Димитријевиќ порача дека целта е победа во Виена и пласман на следното Европско првенство.

Во петок заминување за Виена

Репрезентативците во Скопје ќе одработат неколку тренинг-сесии, видео-анализи и подготовки во теретана, по што во петок ќе отпатуваат за Виена. Во австриската престолнина ќе имаат уште една тренинг-сесија пред неделниот натпревар. Дуелот со Австрија е закажан за 16:05 часот, а македонската селекција ќе се обиде со победа да направи важен чекор кон остварување на целта.