ОГНЕНА СТИХИЈА ВО ЕВРОПА: Над 300.000 луѓе евакуирани, ЕУ испраќа авиони и пожарникари

Европската унија мобилизира итна помош за Франција и Шпанија, каде што огромните шумски пожари принудија повеќе од 300.000 луѓе да ги напуштат своите домови. Во југозападниот дел на Франција пожарот зафатил околу 42.000 хектари, а пламените јазици се приближуваат до поширокото подрачје на Бордо. Во Шпанија пожарникарите се борат со големи пожари западно од Мадрид и во провинцијата Авила, додека повторното зголемување на температурите дополнително ја отежнува состојбата.

ЕУ испраќа авиони, хеликоптери и пожарникари

Преку Механизмот за цивилна заштита, во Франција се испратени седум авиони и четири хеликоптери од повеќе европски држави и од Турција. За помош на Шпанија се мобилизирани шест противпожарни авиони, како и 134 пожарникари и 41 возило од Португалија. Сателитската служба „Коперникус“ обезбедува итни мапи, додека европски претставник е испратен во Бордо за координирање на помошта.

Новиот топлотен бран ја зголемува опасноста

Противпожарните екипи се обидуваат да ги стават пожарите под контрола пред новото зголемување на температурите и намалувањето на влажноста. Во Франција се пријавени нови жаришта, иако пожарникарите успеале да го спречат натамошното ширење на главниот пожар во текот на ноќта. Европските власти предупредуваат дека состојбата може да се влоши и во Португалија, Унгарија, Словачка и Чешка, каде што се очекуваат екстремни временски услови.