Омерагиќ верува во Седлоски и покрај поразите – Ја плаќаме сметката за старото неработење

Претседателот на Фудбалската федерација на Македонија (ФФМ), Масар Омерагиќ, застана во одбрана на селекторот Гоце Седлоски по критиките за четирите порази на македонската репрезентација во Лигата на нации. Во гостувањето во емисијата „Спорт Фокус“ на ТВ Телма, Омерагиќ порача дека Седлоски ја има целосната поддршка и дека не треба да се носат избрзани заклучоци по лошиот почеток. Тој нагласи дека селекторот има докажани резултати во клупскиот фудбал и дека на новиот стручен штаб му е потребно време за да ги пренесе своите идеи на играчите.

Омерагиќ: Критиките се преголеми

„Апсолутно ја има поддршката Гоце Седлоски“, изјави Омерагиќ, додавајќи дека и претходни селектори имале лоши почетоци, дури и против послаби противници. Тој посочи дека репрезентацијата и во минатото играла во Лигата Ц, но тоа не било причина за вакви притисоци и барања за оставки. Омерагиќ очекува на преостанатите два натпревари да се видат подобра игра, повеќе енергија, создадени шанси и голови.

„Сега ја плаќаме сметката на минатото неработење“

Првиот човек на ФФМ оцени дека дел од проблемите во македонскиот фудбал се последица на долгогодишни слабости во работата со младинските категории и развојот на играчите. Тој изнесе критики за начинот на кој во минатото се избирале младинските репрезентативци и селекторите, нагласувајќи дека промените бараат време. Омерагиќ ја бранеше и одлуката да се повикуваат фудбалери од домашното првенство, посочувајќи дека нивната статистика заслужува внимание и дека македонската лига не треба да се потценува.