ОСЛОБОДИТЕЛНА ПРЕСУДА ЗА „ТАЛИР 2“: Нема конфискација на „Белата палата“ и имотот на ВМРО-ДПМНЕ

Основниот кривичен суд донесе ослободителна пресуда за поранешниот премиер Никола Груевски во повтореното судење за случајот „Талир 2“, кој се однесуваше на изградбата на седиштето на ВМРО-ДПМНЕ. Со пресудата повеќе не важи претходната одлука за конфискација на „Белата палата“ и на друг имот на партијата, иако самата ВМРО-ДПМНЕ не беше обвинета во постапката.

Судот се повика на измените на Кривичниот законик

Од Кривичниот суд соопштија дека одлуката е последица на измените на Кривичниот законик, кои суштински ги промениле елементите на кривичното дело. Судот оценил и дека обвинителството останало на истите докази врз основа на кои во 2022 година биле осудени Груевски и поранешниот генерален секретар на партијата Кирил Божиновски, иако во меѓувреме биле променети законските околности.

Претходната пресуда беше укината во 2023 година

Првичниот судски процес започна во 2019 година, а во 2022 година Груевски беше осуден на шест години затвор, додека за Божиновски беше изречена условна казна. Тогаш беше наложена и конфискација на седиштето и на друг партиски имот, но Апелациониот суд во 2023 година ја укина пресудата и го врати предметот на повторно судење. Постапката против Божиновски подоцна запре поради застарување, додека на Груевски му се судеше во отсуство. Со мерките за обезбедување биле опфатени 68 недвижности и друг имот со проценета вредност од околу 17 милиони евра.