ПОЧИНА ВОЛИ ФАНК: На 82 години го оствари сонот и стана највозрасната жена што летала во вселената

Американската пионерка во авијацијата Воли Фанк, која на 82-годишна возраст стана највозрасната жена што отпатувала во вселената, почина на 87 години. Таа починала на 8 јули во својот дом во Грејпвајн, Тексас, каде што живеела во последните години. Фанк зад себе остави исклучително наследство во авијацијата и вселенските истражувања, откако со децении се бореше да го оствари сонот што ѝ бил оневозможен поради тогашните ограничувања за жените.

Шест децении чекала да отпатува во вселената

Во 1961 година Фанк била дел од групата „Меркјури 13“, составена од 13 пилотки кои ги поминале истите медицински и физички тестови како машките кандидати за астронаути на НАСА. Иако успешно ги завршиле тестирањата, жените не добиле можност да бидат дел од американската вселенска програма. Нејзиниот сон конечно се остварил во јули 2021 година, кога како гостинка на Џеф Безос полетала со леталото „New Shepard“ на компанијата Blue Origin. Со 82 години, таа тогаш станала највозрасната личност што отпатувала во вселената, а и понатаму го задржува рекордот како највозрасна жена што го направила тоа.

Пионерка која ги уривала бариерите

Фанк била првата жена инспектор во американската Федерална администрација за авијација и првата жена истражителка за безбедност во Националниот одбор за безбедност во транспортот. Во текот на долгата кариера обучила повеќе од 3.000 пилоти и поминала над 19.000 часа во воздух. Таа остана запаметена како симбол на истрајноста и како доказ дека никогаш не е предоцна да се оствари животниот сон. Од НАСА, Blue Origin и градот Грејпвајн ѝ оддадоа почит за нејзиниот придонес во авијацијата и инспирацијата што им ја остави на идните генерации.