ПОРАНЕШНА БРИТАНСКА МИНИСТЕРКА ПРОНАЈДЕНА МРТВА: Полицијата ја истражува смртта на Ен Видекомб како убиство

Британската полиција отвори истрага за убиство откако поранешната министерка и пратеничка Ен Видекомб била пронајдена мртва во својот дом во Девон. Седумдесет и осумгодишната политичарка била пронајдена во четвртокот, на 9 јули, откако службите за итна помош биле повикани на адресата во близина на Дартмур. Полицијата соопшти дека таа имала сериозни повреди, поради што случајот се истражува како убиство.

Уапсен 26-годишен осомничен

Во меѓувреме, британските власти уапсиле 26-годишен маж под сомнение дека е поврзан со смртта на Видекомб. Според досегашните информации, полицијата не пронашла докази дека случајот е поврзан со тероризам или дека зад него стои политички мотив. Истражителите продолжуваат со прибирање докази и проверка на снимките од видеонадзорот во поширокото подрачје.

Долгогодишна фигура во британската политика

Видекомб беше пратеничка на Конзервативната партија од 1987 до 2010 година и извршуваше неколку министерски функции во владата на Џон Мејџор. Подоцна беше европратеничка од редовите на Брегзит партијата, а потоа се приклучи на партијата „Реформ УК“ на Најџел Фараж. Таа беше позната како гласен поддржувач на Брегзит, но и по бројните настапи во британски телевизиски емисии. Британскиот премиер Кир Стармер и повеќе политичари од различни партии ѝ оддадоа почит, истакнувајќи ја нејзината повеќедецениска јавна и политичка работа.