СЕ УРЕДУВА КЕЈОТ НА ВАРДАР ОД ЛИСИЧЕ ДО ВЛАЕ: Се санираат оштетувањата и нерамните површини

Град Скопје започна со целосно уредување на пешачката зона долж кејот на Вардар, на потегот од Лисиче до Влае. Скопскиот градоначалник Орце Ѓорѓиевски информираше дека активностите опфаќаат санација на оштетувањата на пешачката патека, со цел просторот повторно да биде безбеден и функционален за граѓаните. Кејот е едно од најпосетените места во Скопје, каде граѓаните секојдневно спортуваат, рекреираат и поминуваат време со своите семејства.

Се заменуваат уништените плочки

Во рамки на активностите се заменуваат уништените подни плочки, а се нивелираат и нерамните површини долж пешачката зона. Се санираат и останатите оштетувања со цел да се подобри безбедноста и пристапноста за пешаците.

Кејот треба да биде безбеден за сите генерации

Од Град Скопје посочуваат дека уредувањето има цел кејот повторно да биде функционален и достоинствен простор за сите генерации. Потегот од Лисиче до Влае е значаен дел од пешачката инфраструктура во градот, кој го користат голем број граѓани за рекреација и секојдневно движење.