„ТИГРИТЕ“ ВО АКЦИЈА ВО ТЕТОВО И ГОСТИВАР: Уапсени повеќе лица, пронајдени оружје, муниција и дрога

Полициски акции на повеќе локации

Повеќе лица се лишени од слобода во неколку одделни полициски акции во Тетово и Гостивар, при што биле пронајдени оружје, муниција, дрога, дигитални ваги и пари, соопшти МВР. Во Тетово бил уапсен 41-годишен жител на Лешок, кај кого при претресот биле пронајдени карабин со оптички нишан, пиштол, воздушна пушка и куршуми од различен калибар. Во гостиварското село Куново, пак, полицијата постапувала по пријава за нарушување на јавниот ред и мир со истрели од огнено оружје, по што биле приведени седум лица. При претресите во неколку викенд-куќи биле пронајдени повеќе парчиња огнено оружје и поголема количина муниција.

Пронајдени дрога и дигитални ваги

Во третата акција, која се одвивала во Тетово во текот на ноќта меѓу 21 и 22 август, полициски службеници од СВР Тетово, во координација со САЕ „Тигар“ и Единицата за службени кучиња, извршиле претрес во куќа и работилница. Таму биле затекнати 19-годишник и двајца малолетници на возраст од 16 години, а кај дел од нив биле пронајдени бела прашкаста материја, марихуана и две дигитални ваги. Во објектот дополнително биле пронајдени кутии со бела прашкаста материја и парични средства во различни валути и апоени. Од МВР информираат дека по целосното документирање на случаите, во координација со јавен обвинител, ќе бидат поднесени соодветни пријави.