ТОШКОВСКИ СО ДЕТАЛИ ЗА АКЦИЈАТА: Нелегалните лекови биле наменети за домашниот и странскиот пазар

Тошковски  – Запленети лекови, суплементи, цигари и над 100.000 евра

Министерот за внатрешни работи Панче Тошковски изјави дека дел од нелегалните лекови запленети во полициската акција биле наменети за македонскиот пазар, додека други требало да бидат пласирани во странство. Според првичните информации, дел од лековите требало да завршат на пазарот во соседна земја. Тошковски посочи дека случајот произлегол од претходно спроведени оперативни постапки и вештачења на мобилни телефони. Во акцијата, која била реализирана во Скопје, Тетово и Гевгелија, биле запленети над 100.000 евра, лекови, суплементи, цигари, тутун и други предмети. Во рамки на акцијата биле лишени од слобода шест лица, додека против вкупно осум лица е поднесена кривична пријава. Тие се товарат за повеќе кривични дела, меѓу кои шверцување, примање и давање поткуп, како и производство и пуштање во промет штетни средства за лекување.

Случајот произлегол од претходна оперативна работа

Тошковски посочи дека истрагата била поткрепена со претходни оперативни активности и анализи на содржината од одземени мобилни телефони. Надлежните институции продолжуваат со постапувањето и документирањето на случајот, по што се очекуваат дополнителни информации за текот на истрагата.