ВАРДАР БЕШЕ НА ЧЕКОР ДО СЕНЗАЦИЈА, ПА ДОЖИВЕА ТЕЖОК ПОРАЗ: Рига славеше со 5:2 по продолженија

Вардар ја заврши европската епизода откако по продолженија загуби со 5:2 на гостувањето кај Рига и беше елиминиран од квалификациите за Конференциската лига. „Црвено-црните“ беа на чекор до голем пресврт, бидејќи до 87. минута водеа со 2:0 и имаа резултат кој ги носеше во следната фаза. Давид Бабунски го отвори резултатот во 17. минута, а Азер Омерагиќ во 66. минута ја удвои предноста. Вардар речиси целиот натпревар го одигра со фудбалер помалку, откако Најдовски доби директен црвен картон само две минути по првиот гол.

Рига се спаси во 87. минута

Домаќините го зголемуваа притисокот, а Таиво во 87. минута погоди за 1:2 и го однесе натпреварот во продолженија. Вардар успеа долго да ја зачува предноста и покрај бројчената негатива, но не издржа во завршницата. Уште во 92. минута Ауани израмни на 2:2, со што Рига повторно ја презеде контролата врз двомечот.

Три гола во продолженијата за тежок пораз

До крајот на првото продолжение Рига поведе со 3:2 преку Јаго Сигуеира, а во второто продолжение погодија и Региналдо Рамирез и Каио Фереира. Конечниот резултат беше 5:2 за Рига, додека летонскиот тим го доби двомечот со вкупни 8:4. Останува големата горчина кај вардаровите навивачи, бидејќи македонскиот шампион само неколку минути го делеа од пласман во следната фаза.