ВЕЧЕРВА СЕ ЗАТВОРА ОБИКОЛНИЦАТА КАЈ СОЛУН: Сообраќајот кон Халкидики и аеродромот ќе се пренасочува низ градот

Дел од внатрешната обиколница на Солун вечерва ќе биде затворен за сообраќај поради градежни активности поврзани со проектот „Flyover“. Целосната блокада ќе трае од 23:00 часот вечерва до 05:00 часот утре наутро, а ќе биде затворен правецот кон Халкидики и солунскиот аеродром.

Возилата ќе се пренасочуваат низ Солун

Затворањето го опфаќа делот меѓу клучките К5 кај Евкарпија и К6 кај Метеора, исклучиво во источен правец. Возилата што пристигнуваат од западниот дел ќе бидат насочувани кон излезот кај Евкарпија, од каде преку локалните сообраќајници ќе продолжуваат кон булеварот „Страту“ и централното градско подрачје.

Важно за македонските патници

Оваа измена директно ги засега и македонските граѓани кои во текот на ноќта патуваат кон Халкидики или имаат рани утрински летови од аеродромот „Македонија“. Правецот од Солун кон граничниот премин Евзони, односно Богородица, останува отворен и прооден, но на патниците кон југ им се препорачува да тргнат порано поради можно забавување на сообраќајот низ градот.