Македонија
Дознај прв
(ВИДЕО) ПРВ НАТПРЕВАР ВО КОСЕЊЕ СО РАЧНА КОСА ВО ДЕЛЧЕВО
Во Делчево се одржа првиот натпревар во косење трева со рачна коса, со цел зачувување на традицијата и создавање нова градска манифестација.
Идејата се родила при средба со иселениците во Швајцарија
Во Делчево денеска се одржа првиот натпревар во косење трева со рачна коса, настан посветен на зачувувањето на старите обичаи, трудољубивоста и традиционалниот начин на живот. На манифестацијата присуствуваше и градоначалникот на Општина Делчево, Иван Гоцевски, кој изрази задоволство од успешната реализација. Тој истакна дека идејата се родила за време на неговата посета на Швајцарија и средбата со македонските иселеници, а особено во разговорите со Марјан Маџовски. Според Гоцевски, добрата идеја, кога е поддржана од вистинските луѓе, може да прерасне во прекрасна реалност.
Манифестацијата треба да прерасне во традиција
Градоначалникот порача дека натпреварот ги оживеал спомените на старите вредности и покажал дека традицијата сè уште живее во Делчево. Тој изрази надеж дека ова е само почеток и дека манифестацијата во иднина ќе стане препознатлив традиционален настан за градот. Гоцевски им се заблагодари на сите натпреварувачи и организатори кои со својот труд придонеле за успешното одржување на настанот. Тој очекува следната година натпреварот да привлече уште поголем број учесници и посетители.
