ВУЧИЌ ПРЕДУПРЕДУВА ПОРАДИ ДУНАВ: Ако водата падне уште 30 сантиметри – готови сме

Српскиот претседател Александар Вучиќ предупреди дека екстремно високите температури и рекордно ниското ниво на Дунав може да предизвикаат сериозни проблеми во Србија и во поширокиот регион. Тој изјави дека доколку нивото на реката се намали за дополнителни 30 сантиметри, ситуацијата ќе стане исклучително тешка. Дунав веќе се повлекол на невообичаено ниско ниво по голем дел од својот тек, при што на површината излегле карпи, песочни насипи и остатоци од стари бродови.

Најтешка состојба во Војводина

Според Вучиќ, најголемите проблеми во Србија се забележуваат во Војводина, особено во делови од Банат, каде подолг период немало значителни врнежи. Прогнозите покажуваат дека нивото на Дунав би можело дополнително да се намалува, бидејќи во наредните денови не се очекува посериозен дожд. Истовремено, температурите во регионот се очекува да надминат 38 Целзиусови степени.

Следуваат „десет дена пекол“

Српскиот претседател најави дека следуваат „десет дена пекол“ и предупреди дека земјата се соочува и со рекордна потрошувачка на електрична енергија поради масовното користење климатизери. Тој посочи дека ниското ниво на реките може да создаде уште поголеми проблеми во државите чии нуклеарни електрани зависат од водата за ладење. Вучиќ апелираше состојбата внимателно да се следи, оценувајќи дека екстремната суша и високите температури носат бројни ризици за земјоделството, енергетиката и водниот сообраќај.