ЗАКАНИ КОН ПОЗНАТАТА НОВИНАРКА МИЛКА СМИЛЕВСКА: ЗНМ бара итна реакција од МВР по повиците за „кршење коски“

Здружението на новинарите на Македонија (ЗНМ) бара итна реакција од Министерството за внатрешни работи по заканите за физичко насилство кон новинарката Милка Смилевска. Според ЗНМ, на Фејсбук-профилот „Вистината боли“ била објавена фотомонтажа со ликот на новинарката, по што следувале навредливи и заканувачки коментари. Меѓу нив имало и експлицитен повик за „кршење коски“, насочен кон Смилевска.

Случајот пријавен во МВР

Од ЗНМ оценуваат дека станува збор за директно повикување на физичко насилство, а не за обична критика или несогласување со професионалната работа на новинарката. Случајот веќе е пријавен до Секторот за компјутерски криминал при МВР, од каде се бара да бидат идентификувани лицата кои ги упатиле заканите.

Бараат проценка на безбедноста на новинарката Смилевска

Здружението бара полицијата без одлагање да ја испита содржината и да преземе соодветни законски мерки. Дополнително, бара да се процени какви мерки се потребни за заштита на личната безбедност на Смилевска. Од ЗНМ порачуваат дека заканите кон новинарите не смеат да се третираат како обични коментари на социјалните мрежи.