ПАРТИЗАН СЕ РАСПАЃА: Раул Гонзалез замина, македонските клубови ги следат ракометарите

Раул Гонзалез повеќе не е тренер на Партизан, а заминувањето на шпанскиот стратег е дел од пошироката криза во белградскиот клуб, откако целиот Управен одбор поднесе оставка. Претседателот Миљан Жугиќ се повлекол од функцијата поради неможноста да го финансира клубот во услови на блокада, а со тоа, согласно статутот, е разрешен и целиот Управен одбор.

Гонзалез го раскина договорот, Партизан добива нов тренер

Од клубот соопштија дека Собранието треба да свика седница во рок од 30 дена, на која ќе бидат избрани нов претседател и членови на Управниот одбор. Гонзалез, кој пристигна во текот на летото и го предводеше Партизан во Лигата на шампионите, одлучил да го раскине договорот по новонастанатата ситуација. До крајот на сезоната тимот ќе го води досегашниот помошник Марко Павловиќ. Шпанецот заминува по едно реми и пет порази во Лигата на шампионите, но според објавените информации, резултатите не се причината за разделбата.

Вардар и Пелистер следат можни засилувања

Веднаш по тренерот, од Партизан си замина и левиот бек Милош Кос, кој кариерата ќе ја продолжи во германски Вецлар. Според „Моцарт Спорт“, македонските клубови Вардар, Охрид, Пелистер и Алкалоид внимателно ја следат ситуацијата и можноста да ангажираат ракометари од белградскиот клуб. Алјоша Дамјановиќ, кој игра на позициите лев и среден бек, наводно е на мета на Вардар, додека Јоав Лумбросо, најдобриот играч на Партизан оваа сезона, се поврзува со Пелистер. Засега нема официјална потврда за овие трансфери, но кризата во Партизан отвора можност дел од неговите ракометари да ја продолжат кариерата во македонската лига.