ЖЕСТОК НАПАД ВРЗ КИЕВ: шестмина загинати, погодени станбени згради и детска болница

Руски балистички ракети погодиле цивилни објекти  во Киев

Најмалку шест лица загинале, а 23 се повредени во жесток руски ракетен напад врз Киев, соопшти градоначалникот Виталиј Кличко. Според информациите, руските балистички ракети погодиле повеќе локации во украинскиот главен град, при што биле оштетени станбени и нестанбени објекти. Пожар избувнал на горните катови од деветкатна станбена зграда, додека на друга локација луѓе останале заробени по ударите. Погодени биле и магацини и детска болница, а сведоци за „Ројтерс“ изјавиле дека слушнале повеќе од десет експлозии.

Полска активираше превентивни воздушни операции

По руските напади, Полска започнала превентивни воени воздушни операции со цел да го заштити својот воздушен простор. Нападите врз Украина продолжуваат секојдневно, додека дипломатските напори со посредство на САД и Европа досега не доведоа до траен прекин на огнот. Украинскиот претседател Володимир Зеленски неодамна соопшти дека Киев доставил предлози за план за завршување на војната до американските преговарачи. Во меѓувреме, од Москва порачаа дека се подготвени за нова средба со американските претставници, но дека досега не добиле конкретни предлози за нејзино одржување.