47 СЕМЕЈСТВА ВО ДЕБАР ДОБИЈА НОВ ДОМ: Николоски најави социјални згради и во други градови

Во Дебар денеска беа распределени 47 социјални станови на семејства и лица од ранливите категории на кои им е потребна институционална поддршка. На доделувањето присуствуваа премиерот Христијан Мицкоски, вицепремиерот и министер за транспорт Александар Николоски, директорот на АД за стопанисување со станбен и деловен простор Марјан Стефановски и претставници на локалната самоуправа. Николоски истакна дека станува збор за квалитетно изграден објект, со кој 47 семејства добиваат можност за посигурна иднина и ново животно поглавје.

Станови за најранливите категории

Становите се наменети за деца без родители, корисници на гарантирана минимална помош, лица погодени од елементарни непогоди, лица со попреченост и нивните семејства, како и самохрани родители со малолетни деца. Николоски потсети дека претходно биле доделени 29 станови во Велес, 32 во Кочани, 21 во Струмица и 19 во Гевгелија. Во моментов се активни огласи за распределба на социјални станови во Пробиштип и Свети Николе.

Нови објекти во Бутел, Сарај, Прилеп и Штип

Изградбата на социјални згради во Бутел, Сарај и Прилеп е во завршна фаза, додека се планира изградба на ваков објект и во Штип. Николоски најави дека Владата ќе продолжи со проектите за социјално домување, со кои се решава едно од најважните животни прашања на голем број семејства. Тој додаде дека во Општина Дебар се реализираат 22 инфраструктурни проекти, меѓу кои и булеварот што ќе ја поврзе новата станбена зграда со останатиот дел од градот.