МАРТА КОС СО ПОРАКА ДО МАКЕДОНИЈА: Уставните измени се услов за отворање на првиот кластер со ЕУ

Еврокомесарката за проширување Марта Кос порача дека Македонија покажала посветеност кон реформите за членство во Европската Унија, но дека сега треба да покаже иста решителност и во напредувањето по европскиот пат. Таа го презентираше извештајот на Европската комисија за напредокот на земјите-кандидатки пред Комитетот за надворешна политика на Европскиот парламент. Кос нагласи дека условите за продолжување на евроинтегративниот процес се јасни и дека нивното исполнување зависи од Македонија.

Уставните измени остануваат клучен услов

„Македонија треба да ја исполни обврската за спроведување на уставните измени, како што е наведено во заклучоците на Советот на ЕУ од 18 јули 2022 година“, изјави Кос. Таа посочи дека Европската комисија ќе продолжи да ја поддржува земјата на нејзиниот пат кон членство во Унијата.

Кос: Отворањето на првиот кластер зависи од исполнувањето на условите

Еврокомесарката порача дека целта останува отворање на првиот кластер веднаш штом ќе бидат исполнети потребните услови. „Сега е на Македонија да го стори тоа“, нагласи Кос на прес-конференцијата. Нејзината порака повторно го става прашањето за уставните измени во центарот на процесот на евроинтеграција на земјата.