90 % ОД ПОЖАРИТЕ ВО ФРАНЦИЈА СЕ ПОВРЗУВААТ СО ЧОВЕЧКИ ФАКТОР: Уапсени над 400 лица

Околу една третина од пожарите биле намерно подметнати

Француските власти се сомневаат дека девет од десет шумски пожари во земјата биле предизвикани од човечки фактор, додека околу една третина од случаите се поврзуваат со намерно подметнување. Од почетокот на сезоната во Франција биле регистрирани најмалку 14.000 пожари, а во полициските акции биле уапсени 402 осомничени лица. Меѓу приведените имало и 156 малолетници, додека 35 лица биле задржани во притвор. Податоците покажуваат дека човечката небрежност и намерното предизвикување оган остануваат меѓу главните непосредни причини за пожарите.

Во Европа изгореле околу 465.000 хектари

Според Европскиот информативен систем за шумски пожари, годинава во Европа биле опожарени околу 465.000 хектари во 1.433 пожари. Најголема изгорена површина била евидентирана во Шпанија, по што следуваат Франција, Италија, Португалија, Романија и Грција. И во Грција биле извршени повеќе апсења, при што најголемиот дел од осомничените биле гонети поради криминална небрежност. Италијанските власти, пак, користат специјализирани полициски тимови и дронови за патролирање во областите со висок ризик од намерно подметнување пожари.