БЕЗБЕДНОСЕН ИНЦИДЕНТ ВО ЛАЈПЦИГ: Дрон со експлозив пронајден во близина на украински авион

Летовите биле привремено прекинати и пренасочени

НАТО потврди дека во текот на ноќта во близина на украински товарен авион на аеродромот Лајпциг/Хале било забележано беспилотно летало, по што дел од операциите биле привремено прекинати. Според безбедносни извори, дронот бил опремен со експлозив и детонатор и се наоѓал во непосредна близина на авион на украинската компанија „Антонов ерлајнс“. Неколку авиони, меѓу кои и еден патнички, биле пренасочени поради неидентификуваното летало и сомнителен предмет во близина на пистата. Северниот дел од аеродромот повторно бил отворен рано утрото, додека јужниот останал затворен поради истрагата.

Полицијата ја испитува поврзаноста меѓу дронот и предметот

Во близина на јужната писта бил пронајден сомнителен предмет, кој полицијата го прегледала со робот наменет за отстранување експлозивни направи. Истражителите проверуваат дали предметот е поврзан со неидентификуваното беспилотно летало. Портпарол на полицијата изјавил дека нема непосредна опасност за јавноста. Аеродромот Лајпциг/Хале има важна улога во транспортот на воена опрема за германската армија и сојузниците од НАТО, а таму е сместена и базата на украинската карго-компанија „Антонов ерлајнс“.