(ВИДЕО) ВОЗЕЛ ПО ВЕЛОСИПЕДСКА ПАТЕКА ВО СКОПЈЕ: МВР го пронајде и го казни 46-годишниот возач

Полицијата санкционираше 46-годишен скопјанец кој управувал автомобил „сузуки“ по велосипедска патека покрај улицата „Бутелска“ во Скопје. Случајот бил откриен откако на социјалната мрежа „ТикТок“ било објавено видео на кое се гледа возилото како се движи по патеката, во правец од кружниот тек кон крстосницата со булеварот „Босна и Херцеговина“. По објавата, Одделението за безбедност на патниот сообраќај при СВР Скопје презело мерки за утврдување на идентитетот на возачот.

Идентификуван по видеото на социјалните мрежи

Возачот бил идентификуван како Н.К. (46) од Скопје, кој на 28 октомври бил повикан на службен разговор во полиција. Од МВР информираат дека тој е соодветно санкциониран за сообраќајниот прекршок, односно управување возило по несоодветна сообраќајна површина.

МВР со апел до возачите

Министерството за внатрешни работи апелира до сите учесници во сообраќајот да ги почитуваат правилата и прописите и да не ја загрозуваат безбедноста на другите. Од полицијата потсетуваат дека велосипедските патеки се наменети за велосипедистите и дека нивното користење од моторни возила може да ја загрози нивната безбедност.