УКИНАТА ЗАБРАНАТА ЗА ЛЕТОВИ ВО САД: Илјадници летови откажани, десетици илјади патници заглавени

Федералната управа за воздухопловство на САД (FAA) ја укина четиричасовната забрана за полетувања, воведена поради проблеми со комуникациските системи за контрола на воздушниот сообраќај, јави ДПА. И покрај укинувањето на мерката, се очекува нарушувањата во авиосообраќајот да продолжат, откако илјадници летови беа откажани, а десетици илјади патници останаа заглавени на американските аеродроми. FAA соопшти дека по темелното тестирање на системите е дозволено продолжување на дел од летовите.

Дефекти во радио и радарските системи во САД

Американскиот министер за транспорт, Шон Дафи, изјави дека за целосно нормализирање на состојбата ќе биде потребно време поради недостигот од авиони и екипажи. Тој објасни дека проблемите биле предизвикани од дефекти во радио и радарските системи, како и од преоптоварување на рутерите поради истовремено користење постара и понова технологија.

Не се исклучува можноста за кибернапад

Министерот за внатрешна безбедност, Марквејн Мулин, оцени дека затворањето на воздушниот простор било неопходна безбедносна мерка. Според него, засега нема индиции дека прекинот бил предизвикан од кибернапад, но таа можност не е целосно исклучена. FAA во својата историја само двапати го затворила воздушниот простор на САД – по терористичките напади на 11 септември 2001 година и во февруари 2023 година, поради дефект на системот за известување на пилотите.