Македонија
Дознај прв
СИНДИКАЛНАТА КОШНИЧКА ДОСТИГНА 70.827 ДЕНАРИ: Две минимални плати не ги покриваат основните трошоци на едно семејство
Синдикалната кошничка за ноември достигна 70.827 денари. На семејство со две минимални плати му недостигаат 18.735 денари, а под кирија 34.110 денари.

Две минимални плати денес обезбедуваат 3.334 денари повеќе отколку лани, но месечните трошоци на едно четиричлено семејство пораснале за 5.654 денари. Тоа значи дека семејство со две минимални плати годинава има потреба од дополнителни 2.320 денари за да ги покрие истите потреби како минатата година. Според најновата пресметка на Сојузот на синдикатите на Македонија (ССМ), синдикалната минимална кошничка за ноември изнесува 70.827 денари. Во оваа сума не е вклучена киријата, а пресметката се однесува на семејство со двајца возрасни и две деца на училишна возраст. Двете минимални плати заедно изнесуваат 52.092 денари, што значи дека до покривање на основните месечни трошоци недостигаат 18.735 денари.
Најголем јаз меѓу минималните плати и кошничка во последните три години
Споредбата на ноемвриските пресметки покажува дека во 2024 година кошничката изнесувала 62.021 денар, а со две минимални плати недостигале 16.887 денари. Лани разликата се намалила на 16.415 денари, но годинава повторно пораснала и достигнала 18.735 денари. Во однос на октомври, кошничката е повисока за 469 денари, иако трошоците за храна и пијалаци се намалиле за 268 денари. Растот кај останатите ставки, кој изнесува 737 денари, го надминал намалувањето кај храната.
За семејствата под кирија потребни се 86.202 денари месечно
Посебна пресметка на ССМ покажува дека за семејство кое изнајмува стан од 60 квадратни метри, месечните трошоци достигнуваат 86.202 денари. Со две минимални плати, на таквото семејство му недостигаат 34.110 денари. Заедно, двајцата возрасни би требало да заработуваат по 43.101 денар нето за да ги покријат трошоците предвидени со кошничката, вклучувајќи ја и киријата. Дополнително, трошоците за храна и пијалаци во ноември изнесуваат 25.902 денари, наспроти 23.534 денари во истиот месец лани.

