БЕНЗИНОТ ВО САД ПОВТОРНО НАД ЧЕТИРИ ДОЛАРИ: Цените пораснаа за повеќе од 30 проценти

Просечната цена на бензинот во Соединетите Американски Држави повторно ја надмина психолошката граница од четири долари за галон, во услови на зголемена неизвесност на светскиот пазар на нафта.

Според Американската автомобилска асоцијација, националниот просек во понеделникот достигнал 4,003 долари за галон. Од крајот на февруари просечната цена на бензинот во САД се зголемила за повеќе од 30 проценти.

Конфликтите ја зголемија цената на нафтата

Растот на цените се поврзува со обновените конфликти меѓу САД и Иран и загрозениот проток на нафта низ Ормутскиот Теснец, преку кој пред почетокот на војната поминувала околу една петтина од светската сурова нафта.

По пропаѓањето на прекинот на огнот на почетокот на јули, цената на суровата нафта пораснала за околу 16 проценти во споредба со претходната недела. Бидејќи нафтата претставува најголем дел од трошоците за производство на гориво, поскапувањето директно се одразило и врз цените на американските бензински пумпи.

Дополнителен притисок врз пазарот создаваат намалениот капацитет на руските рафинерии и американските резерви на гориво, кои остануваат под повеќегодишниот просек.

Поскапувањето станува и политички проблем

Високите цени на горивата може да претставуваат сериозен политички предизвик за американскиот претседател Доналд Трамп и Републиканската партија пред конгресните избори во ноември.

Цените на бензинот традиционално имаат големо влијание врз расположението на американските гласачи, особено бидејќи директно ги зголемуваат секојдневните трошоци на домаќинствата. Продолжувањето на растот би можело дополнително да го зголеми незадоволството кај потрошувачите и да влијае врз изборната кампања.