МАКЕДОНСКИ ВОЗАЧИ ОСТАНАЛЕ БЕЗ ТАБЛИЧКИ ВО ПЕФКОХОРИ: Грчката полиција со засилени контроли

Одземени таблички од возила со велешки и неготински ознаки

Повеќе македонски возачи наводно останале без регистарските таблички и добиле парични казни при полициска контрола во Пефкохори, објави Фејсбук-страницата „Grčka Info“. Според објавеното сведоштво, грчката полиција најпрво санкционирала грчки државјанин, по што биле одземени табличките и од автомобили со неготински и велешки регистарски ознаки. Контролата продолжила и на останатите возила кои се наоѓале во колоната. Авторот наведува дека полициските службеници брзо ги отстранувале табличките и им изрекувале парични казни на возачите.

Нема официјална потврда за причината за санкциите

Засега не е наведено поради кои конкретни сообраќајни прекршоци биле санкционирани македонските државјани. Нема ниту официјална потврда или соопштение од грчката полиција за случајот. Возачите кои патуваат во Грција се повикуваат строго да ги почитуваат правилата за паркирање, ограничувањето на брзината и останатата сообраќајна сигнализација. Информациите за случајот во моментов се темелат на објавата и сведоштвата споделени на социјалните мрежи.