ВУЧИЌ ПРЕДУПРЕДУВА ЗА ДУНАВ: „Ако нивото падне уште 30 сантиметри, готови сме“

Реката се повлече на невидено ниско ниво

Српскиот претседател Александар Вучиќ предупреди дека екстремните горештини и ниското ниво на Дунав може да предизвикаат сериозни проблеми во Србија и во регионот. Реката се повлекла на невидено ниско ниво по голем дел од својот тек, при што на површината се појавиле карпи, песочни насипи и стари бродоломи. Се очекува нивото дополнително да се намалува, бидејќи во следните денови не се прогнозираат позначителни врнежи. Вучиќ изјави дека доколку Дунав падне за уште 30 сантиметри, последиците би можеле да бидат исклучително сериозни.

Најтешка е состојбата во Војводина

Според Вучиќ, дополнителен проблем имаат државите чии нуклеарни централи зависат од водата во Дунав за нивното функционирање. Тој посочи дека најголеми тешкотии во Србија има во Војводина, особено во делови од Банат, каде подолг период немало врнежи. Српскиот претседател најави и „десет дена пекол“ со температури над 38 степени и рекордна потрошувачка на електрична енергија поради масовната употреба на клима-уреди. Ниското ниво на Дунав може да влијае врз речниот транспорт, енергетиката, земјоделството и снабдувањето во повеќе земји низ кои минува реката.