УЈП ГО ПРЕЗЕНТИРАШЕ Е-ФАКТУРА ПРЕД БАНКИТЕ: Сите засегнати страни се вклучуваат во процесот

Нов дигитален систем за фактурирање

Управата за јавни приходи го презентираше системот е-Фактура пред претставници на банкарскиот сектор, како дел од активностите за дигитализација на процесите поврзани со фактурирањето. Работилницата е организирана во соработка со Македонската банкарска асоцијација, а на неа присуствувале околу 50 претставници од банките. На учесниците им биле презентирани функционалностите и можностите на системот, а имале можност практично да се запознаат и со креирањето електронска фактура.

Банкарскиот сектор важен дел од процесот

Вклучувањето на банките е значајно поради нивната улога во реализацијата на електронските и безготовинските плаќања. Од УЈП велат дека навременото запознавање со новите дигитални процеси треба да овозможи нивна полесна и поефикасна примена во пракса. Во изминатиот период биле организирани работилници и средби и со други корисници, меѓу кои шпедитери, општини, јавни претпријатија и компании. УЈП најавува дека продолжува со информирање, практична поддршка и тестирање на системот, со цел создавање поефикасен и целосно дигитализиран процес на фактурирање.