ЕДНО ЛИЦЕ ЗАГИНА ВО ПОЖАРОТ КАЈ ОМИШ: Над 40 повредени, огнот повторно се разгорува

Пронајдено тело во опожареното подрачје

Едно лице загина во големиот шумски пожар кај хрватскиот град Омиш, а телото е пронајдено при прегледот на опожареното подрачје. Идентитетот на жртвата засега не е потврден. Во пожарот се повредени повеќе од 40 лица, од кои седум се во животна опасност и се приклучени на респиратори. Четворица од повредените се префрлени на лекување во Загреб, меѓу кои и 17-годишна девојка. Во пожарот изгореа бројни објекти, возила и пловила, а причинета е огромна материјална штета.

Огнот повторно се разгорува

Иако утрово властите соопштија дека ситуацијата е смирена и пожарот е ставен под контрола, во попладневните часови огнот повторно се разгорел. Засилувањето на ветерот создава страв од ново ширење на пожарот, кој вчера се прошири од Локва Рогозница кон Омиш. Во текот на ноќта биле евакуирани околу 1.200 жители и туристи, а речиси 200 луѓе биле спасени од морето откако бегале од огнената стихија. Хрватскиот претседател Зоран Милановиќ изјави дека пожарот можеби не е само природен, оставајќи простор за сомнеж дека можеби бил подметнат.